(2014.05) 連續去咗幾個以觀光為主嘅旅行，今次決定重拾陽光海灘嘅感覺。為咗試吓新地方，就近近哋揀咗越南峴港。近期峴港已經漸漸成為熱門旅遊點，其中一個原因可能係因為機程近，直飛唔駛兩個鐘就到喇。
不過，唔知係咪我訂得遲(其實都三個月前訂)，去程早機已滿，只有下午五點幾機。如果可以早機去時間應該可以好掌控好多。
Day 1
Check point #1: 機場Plaza Premium Lounge
去到機場時間尚早，打算坐低食個下午茶先。諗諗吓，好似有某啲信用卡可以用機場嘅Plaza Premium Lounge。一問之下，原來真係AE嘅CX card同Citibank Premier Miles都有用。我同爸爸加埋一共有三張卡，所以連Jobee都可以帶入場，食咗個好豐富嘅下午茶先上機。
峴港時間比香港慢一個鐘頭，所以五點半機本來到步七點幾但當地時間只係六點多啲。因為package有包車來回機場，我哋到步就有人攞住個名牌接機，都好方便。
出機場時本來諗住換錢，但見人多，最後都係到酒店先換，滙率都係差唔多。建議越南盾唔需要換太多，我哋只係換咗二百美金左右，因為好多地方可以直接用美金，咁當然又要有美金喺身先得啦。
Check point #2: Danang InterContinental Sun Pennisula Resort
今次入住InterContinental Sun Pennisula Resort，地位比較遠，從機場出發車程約四十分鐘。與小朋友同遊，本來係諗住揀Hyatt Regency嘅，因為好多朋友都讚Hyatt對一家大細嚟講好啱玩。但我哋因為見到InterCon嘅網頁有提過可以釣魚，而釣魚一向係爸爸喺陽光海灘嘅主打活動，所以都係揀咗前者。可惜，最終都係無法出海，不過此乃後話。
唔知係咪五一長假期嘅關係，酒店安排有啲亂，我哋見到另一班香港人啲房間好多錯漏。我哋好彩無誤，但check-in都等咗好耐。
Jobee飲一啖welcome drinks後驚為天人，望一望隻杯話:「咩drinks嚟架？咁好飲嘅……」然後成杯喺幾秒內一飲而盡。
終於入到房，但個電視有問題，又整咗半個鐘先可以出門口…… 因為resort比較大，出入要用buggy又用咗啲時間，Jobee第一次坐覺得好新奇。而我同爸爸就有啲心急，要快啦！因為我哋想喺晚飯前帶Jobee去睇第一個重頭戲，就係依張桌球枱啦！
 |
| Pool table冇snooker table咁高，Jobee 玩到不亦樂乎。 |
 |
| 打完桌球，終於可以食晚飯啦！ |
 |
| 返到房我們計劃吓第二日行程，大家都好興奮好期待呀！ |
Day 2
今朝起身嘅第一件大事係居然有隻超巨型嘅昆蟲喺露台上生蛋！本來以為係隻蟬，但望落又似一隻手掌咁大嘅曱甴…… 總之就極其恐怖。
因為我好驚佢會飛，所以禁住唔比爸爸去搞佢，call咗人幫手清理。個housekeeping哥哥嚟到時Jobee好緊張，即刻問可唔可以唔殺佢，個哥哥果然輕輕手用條毛巾包住隻巨蟲媽媽放生咗，真係皆大歡喜！ |
| 攞走咗巨蟲後，爸爸再清理乾淨啲蟲蛋。 |
 |
| 之後先去咗concierge預約依幾日嘅行程，再食早餐。經過桌球枱兩個又要玩吓先...... |
酒店倚山而建，分四層: Heaven, sky, earth, sea. 有一部好得意嘅纜車貫通。如果唔想坐纜車，亦可以叫buggy接送。
第二個重頭節目就係去沙灘玩沙喇。因為知道依間酒店唔係主打家庭，所以我哋自備咗玩沙工具。可惜啲沙粗粗哋，跪得耐膝頭仲有啲痛添……
 |
| Jobee話要砌「窮人國」同「富人國」，再加條隧道等啲水可以由富人流比窮人，係咪好抽象呢？ |
 |
| 玩完沙，踢吓浪先…… |
 |
| 玩咗成個幾鐘，決定返房沖個涼先。途經放滿燈籠嘅小樓閣同好靚嘅花田。 |
 |
| 浸浴又係另一項兩仔爺至愛玩意，潑水同花灑都玩一餐！ |
 |
| 終於到咗媽咪我最喜愛嘅節目，就係「食」啦！ |
到三點，我哋本來book咗隻船出海釣魚。但去到海灘時發現問題來了，原來隻船係一種叫「basket boat」嘅手划船，冇摩打嘅，加上個海都幾大浪，所以一向穩陣嘅爸爸一睇就覺得唔對路。
後來，工作人員提議可以在岸邊釣魚，仲為我哋準備埋魚餌。本來以為去岸邊大石旁落線試吓，點知佢哋就叫我哋喺灘上釣，點可能有魚？當人儍仔咩！
 |
| 隨便幫兩仔爺影兩張相後，我哋就走人了…… |
 |
| 走嘅時候經過桌球枱，例牌又要打番局。 |
我哋嘅爸爸有個奇怪嘅習慣，就係去到邊度都想放隻風箏。今次都唔例外，而且仲想喺露台放，當然係…… 唔成功啦……
 |
| 露台試點失敗後，爸爸去咗條路度放，不過周圍太多樹，一樣唔成功。 |
酒店內嘅餐廳選擇唔多，其中一間La maison 1881係著名嘅米芝蓮三星法國菜，但唔招待十二歲以下小童。今日到晚飯時間，我哋決定出去Danang City揾吓地道美食。
Check point #3: Danang City Syrena Beach Restaurant
從酒店坐的士到Danang City約二十至二十五分鐘，事先同司機講定價錢仲可以叫佢等我哋(來回48萬越南盾，約200港幣)。今次嘅餐廳係朋友介紹嘅，海鮮好新鮮，煮小菜嘅水準就普通，感覺有啲homemade，但都食得過，而且算坐得舒服。
 |
| 外面嘅海鮮缸都幾乾淨，由於對有腳海鮮過敏，爸爸揀咗蜆、螺、同帶子。 |
Jobee本來喺坐車途中瞓著咗，不過有得食又精神返。之後我哋仲去咗旁邊嘅夜市攤行吓，第二日算係過得充實又滿足。
Day 3
第三日起身心情大靚，因為由露台望出個海嘅感覺真係好寧靜好舒服。
 |
| Jobee一起身就幫爸爸踩背脊massage，抵錫！ |
 |
| 早餐後，同Jobee去咗一趟playroom。 |
同時，童心未泯嘅爸爸死心不息係都要放起隻風箏。今日喺沙灘放，終於都成功咗啦，而且仲飛得好高添！可惜，唔到十分鐘隻風筝忽然跌咗落水，爸爸最後只好放棄啦……
然後，我哋決定去游吓水先！本來酒店上層有一個幾大嘅泳池，但只供十二歲以上人士。其實Jobee游水仲叻過我，所以我哋想試吓問吓比唔比佢游，但原來根本冇位比我哋settle down，全部座位望落好舒適，但已經爆晒。咁我哋就只好落返地面個細池啦……… 咁小朋友又冇乜所謂嘅，游細池一樣咁開心。
 |
| 峴港嘅五月天氣一流，晴空萬里，又唔會太熱，而且涼風陣陣，好清爽！ |
繼上次北京之旅爸爸好man咁一手拍開地鐵門後，今次又再次印証咗我嘅諗法: 爸爸前世可能係武林高手！
見頭先冲完涼後廁所窗開咗，爸爸居然二話不說由露台爬去浴室，再由窗走返入室內！
 |
| 爸爸研究一番點解會被反鎖(因為佢驚有鬼！)，後來發現原來鎖心有個位壞咗…… |
今日三點酒店有shuttle bus去「會安古城」，臨行前我哋惡補吓歷史，原來會安(Hoi An)喺16,17世紀嘅時候曾經係東南亞重要嘅港口及經貿中心，有中國、荷蘭、日本及印度人都曾經定居。由酒店去會安要大約一個半鐘頭，Jobee玩咗成朝，坐一陣車後好快就瞓著咗。
到步一落車行咗兩步即刻有人力車伕好落力咁兜生意。本來我哋諗住自己行，但行兩步車伕即刻追上嚟話減價(每位20萬越南盾，即唔駛一百蚊港幣)，見Jobee個樣都幾好奇，坐就坐啦！
雖然話係古城，但其實古蹟唔算多。大部份係平房型式賣藝術品嘅商鋪，有啲兩層嘅樓房好似古代嘅客棧咁。比較特別嘅係好多平房上都種滿咗花或者吊滿燈籠，都幾靚架！
 |
| 比較有規模嘅建築係中國華僑起嘅廟宇，充滿中國特色。 |
 |
| 河邊食肆好有風味。 |
 |
| 傍晚時份，我哋搵咗間河邊嘅餐廳坐低飲杯嘢同食小吃。 |
 |
| Jobee與燈籠留影。 |
Day 4
時間過得好快，又到最後一日啦…… 每一次去旅行，Jobee到最後一日都會超失落，今次已經算有進步啦……
酒店好爆，想加錢都冇得late check-out，但離開係夜機，唯有揾節目啦。本來同酒店book咗部車諗住去「五行山」行吓，但起身時好大太陽，我唔想行到一身大細汗搭飛機，所以最後都係決定留喺舒服嘅酒店度hea。
 |
| 今日個天好靚，真正係海天一色。 |
 |
| 兩父子再戰桌球枱。 |
 |
| 兩日以來Jobee拾咗好多貝殼，但為咗教育佢貝殼係國家財產，我哋堅持唔帶走，最後佢依依不捨地同貝殼影相。 |
 |
| Lobby留影。 |
 |
| 各有各hea。 |
 |
| 轉場再hea。 |
 |
| Late lunch，但Jobee話唔肚餓，寧願玩沙。 |
走之前都有段小插曲。Jobee玩沙時想加水，我哋叫佢可以加旁邊水缸嘅水(Resort比人「畢」出嚟沖腳用嘅水)。點知佢用晒全缸水，仲倒轉頭加啲沙入個乾淨嘅缸內。
好彩後來佢都知道自己好唔應該，走過去同個哥哥道歉，話下次唔敢啦……
 |
| 五點幾，終於要踏上歸途啦，Jobee仲喺機場食埋最後一碗越南粉，食得幾恣意！ |
今次嘅陽光海灘之旅冇上幾次旅行咁多節目，但休息得好好，日日瞓到自然醒，而且一家人享受咗好多quality time. 唔駛兩個鐘頭機就可以逃離繁囂充充電，我相信峴港絕對有潛力成為更多人鍾意嘅渡假勝地。
另外，今次Jobee嘅攝影作品為我哋帶嚟唔少驚喜，以下係一啲我最喜歡嘅相，我覺得好有feel…… 能夠用畫面記錄感受係好嘅開始，Jobee，加油呀！
另外，今次Jobee嘅攝影作品為我哋帶嚟唔少驚喜，以下係一啲我最喜歡嘅相，我覺得好有feel…… 能夠用畫面記錄感受係好嘅開始，Jobee，加油呀！
沒有留言:
張貼留言